Vitan er pallurin - forvitni er drívmegin
SitemapRSS

Fróðskaparrit 62 sum bók og tøkt talgilt

Fróðskaparrit nr. 62 í røðini er prentað við sjey vísindaligum greinum og yvirlit yvir nýggjar ph.d.arar í 2014-2015. Ritstjórar eru Erla Olsen, Hans Andrias Sølvará og Magni Mohr. Permumyndina hevur Silja Strøm gjørt.
22.08.2016Fróðskapur
Fróðskaparrit 62 sum bók og tøkt talgilt

Í nýggja ritinum eru fýra greinir innan hugvísindi. Eivind Weyhe málfrøðingur hevur skrivað tvær greinar.  Onnur greinin er um staðarnavnið Grømmi á Viðareiði. Hin greinin er framhald um orðið heltn í føroyskum staðarnøvnum.

Rolf Guttesen geografur hevur skrivað drúgva grein um fyrru helvt av 1800-talinum, sum kann kallar “Diffusión av tingum og tankum”.

Firouz Gaini antropologur hevur grein um fatanina hjá føroyskum ungdómi um framtíðar heim og flyting.

Tvær greinir eru innan náttúruvísindi. Anna Maria Fosaa plantufrøðingur hevur grein um árinið av seyðabiti og broyttum veðurlagi á plantuvøkstur í fjallaøkjum. Erla Olsen lívfrøðingur hevur grein um arbuskul soppasamfeløg og sopprótagróður í planturótum sum broytist í mun til plantuslag og taðevni í moldini.

Fyri fyrstu ferð í mong ár er eisini ein grein innan heilsuvísindi.  Magni Mohr hevur skrivað grein um ávirkanina av natriumbikarbonat inntøku á mát fyri kropslig fótbóltsavrik við støði í árinunum av kropsligari venjingarstøðu.

Ritstjóraskifti
Hetta er fyrsta ritið hjá nýggju ritstjórnini, sum tók við í 2015, eftir at Dorete Bloch og Elin Súsanna Jacobsen høvdu ritstjórnað í fleiri ár. Ein grein er um hetta skiftið við heitinum “At stíga í úrmælingafótaspor”.

Fróðskaparrit eisini tøkt talgilt
Seinasta árið hevur Erla Olsen, ritstjóri arbeitt við at talgilda Fróðskaparrit. Ætlanin er, at ritið skal vera opið fyri øll uttan kostnað at lesa ella at geva út í.

Fyribils ber til at lesa ritini nr. 60-62 á heimasíðuni fsj.um.fo  Í næstum verður farið undir at fáa fígging til arbeiðið at leggja eldri rit út eisini. Framyvir verða greinar til Fróðskaparrit almannakunngjørdar á heimasíðuni, so hvørt tær verða góðkendar til útgávu. Ein bók við greinum verður framhaldandi givin út árliga.

Fróðskaparrit er nú eisini skrásett í CrossRef, sum er kravd skipan, fyri at ritið kann verða skrásett hjá Google Scholar og Web of Science. Hesar skrásetingar eru í nógvum førum fortreyt fyri, at granskarar vilja geva sínar greinar út í einum vísindatíðarriti.  Hesar dagføringar skulu gera Fróðskaparrit áhugaverdari sum vísindarit at geva tilfar út í og at lesa.

Ritið er 125 bls. og kostar 270 kr. í bókabúðunum.

Eru viðmerkingar ella spurningar til  Fróðskaparrit, ber til at venda sær til forlagið við telduposti til frodskapur(at)setur.fo

Seinastu tiðindi

06.03.2017
Minninarorð um Henriette Rasmussen
Beinta í Jákupsstovu skrivar minningarorð um Henriette Rasmussen, ið andaðist fríggjadagin
05.03.2017
Atlantic Airways knýtir ungdóm og lesandi nærri Føroyum
Sveiggj: nýggir flogferðaseðlar til ung og lesandi.
28.02.2017
Almenn móttøka fríggjadagin 3. mars kl. 15
Í sambandi við at Turið Sigurðardóttir, professari, fer úr starvi á Føroyamálsdeildini, verður...
23.02.2017
Har Hammershaimb møtir Marx og Freud
Móðurmálsdagurin 2017 verður í Løkshøll 25. mars
23.02.2017
Gestur í nýtt starv í Nuuk
Gestur Hovgaard verður instituttleiðari á Ilisimatusarfik
Fleiri tíðindi...
Vísir 1 til 10 av 1682
Samband
Fróðskaparsetur Føroya
J.C. Svabos gøta 14
FO-100 Tórshavn
Tel.: +298 352500
Faks: +298 352501
setur(at)setur.fo